एजेन्सी, पुस ११। कनाडाको टोरंटोस्थित टोरंटो विश्वविद्यालयको स्कारबोरो परिसर नजिकै भएको गोलीबारीमा २० वर्षीय भारतीय छात्र शिवांक अवस्थीको मृत्यु भएको छ।

भारतीय वाणिज्य दूतावासले सामाजिक सञ्जाल प्लेटफर्ममा बयान जारी गर्दै घटनाप्रति दुख व्यक्त गरेको छ। दूतावासले भनेको छ, “टोरंटो विश्वविद्यालय स्कारबोरो परिसर नजिकको गोलीबारीमा युवा भारतीय छात्र शिवांक अवस्थीको दुखद मृत्यु प्रति हामी गहिरो शोक व्यक्त गर्छौं। हामी शोकसन्तप्त परिवारसँग सम्पर्कमा छौं र स्थानीय अधिकारीहरूसँग समन्वय गर्दै आवश्यक सहायता प्रदान गरिरहेका छौं।”

पुलिसका अनुसार, गोलीबारीको खबर पाएलगत्तै घटनास्थलमा पुग्दा २० वर्षीय अवस्थी घाइते अवस्थामा भेटिए। उनलाई तत्काल उपचारका लागि लगिँदा पनि मृत्यु भइसकेको थियो। प्रहरीले घटनास्थललाई सील गरेको छ भने आरोपी घटनास्थलबाट फरार भएको जानकारी दिएको छ।

यो घटनासँगै टोरंटोमा यस वर्ष ४१ औं हत्या भएको छ। यस घटनाको ठीक एक दिनअघि ३० वर्षीय भारतीय नागरिक हिमांशी खुरानाको पनि टोरंटोमा हत्या भएको थियो। प्रारम्भिक अनुसन्धान अनुसार उनका पार्टनर ३२ वर्षीय अब्दुल गफूरी यस घटनासँग सम्बन्धित रहेको संदेह गरिएको छ। हिमांशीको मृत्युमा पनि भारतीय दूतावासले शोक व्यक्त गरेको थियो।