काठमाडौँ, पुस ११ । सिंहदरबारमा मन्त्रिपरिषद् बैठक सुरु भएको छ। प्रधानमन्त्री सुशीला कार्कीको अध्यक्षतामा केहीबेरअघि नियमित मन्त्रिपरिषद् बैठक प्रारम्भ भएको हो।
आजको बैठकमा हालै नियुक्त भएका परराष्ट्रमन्त्री बालानन्द शर्मा पनि सहभागी छन्। पद तथा गोपनीयताको शपथ ग्रहण गरी औपचारिक रूपमा पदभार सम्हालेपछि शर्मा सहभागी भएको यो पहिलो मन्त्रिपरिषद् बैठक हो।
सरकारी स्रोतका अनुसार आजको बैठक नियमित प्रकृतिको भए पनि समसामयिक राजनीतिक अवस्था, प्रतिनिधिसभा निर्वाचनको तयारी, मन्त्रालयगत कार्यप्रगति तथा प्रशासनिक निर्णयहरूबारे छलफल हुने अपेक्षा गरिएको छ। फागुन २१ गतेका लागि तय भएको प्रतिनिधिसभा निर्वाचनलाई लक्षित गर्दै आवश्यक तयारी, सुरक्षा व्यवस्थापन, बजेट तथा कानुनी प्रक्रियाबारे पनि छलफल हुनसक्ने बताइएको छ।
यसैगरी बैठकमा विभिन्न मन्त्रालयले पेश गरेका प्रस्तावहरू, नियुक्ति, सरुवा तथा नीतिगत निर्णयहरूबारे छलफल गरी निर्णय लिने सम्भावना रहेको छ। पछिल्लो समय राजनीतिक दलहरूबीच बढ्दो गतिविधि, चुनावी तयारी र सरकारको कार्यदक्षताका विषयहरू पनि बैठकको एजेन्डामा पर्ने अनुमान गरिएको छ।
नवनियुक्त परराष्ट्रमन्त्री शर्माले पदभार ग्रहण गरेपछि छिमेकी तथा मित्र राष्ट्रहरूसँगको सम्बन्ध सुदृढ बनाउने, नेपालको अन्तर्राष्ट्रिय छवि मजबुत बनाउने र कूटनीतिक सक्रियता बढाउने प्रतिबद्धता जनाइसकेका छन्। आजको मन्त्रिपरिषद् बैठकमा उनको सहभागितालाई पनि अर्थपूर्ण रूपमा हेरिएको छ।
मन्त्रिपरिषद् बैठकका निर्णयहरू बैठक सम्पन्न भएपछि सार्वजनिक गरिने सरकारको तयारी छ।
प्रकाशित मिति: २०८२ पुष ११, शुक्रबार १७:०२
