भक्तपुर, माघ ३ । भक्तपुरमा छोराले आफ्नै आमाको धारिलो हतियार प्रहार गरी हत्या गरेको दर्दनाक घटना सार्वजनिक भएको छ। मध्यपुर थिमि नगरपालिका–३ तेर्सेटार क्षेत्रमा शुक्रबार राति २७ वर्षीय प्रविण भण्डारीले ५० वर्षीया आमा सरिता भण्डारीको हत्या गरेका हुन्।

जिल्ला प्रहरी परिसर भक्तपुरका अनुसार धनुषाको मिथिला नगरपालिका–११ स्थायी घर भएका आमा–छोरा विगत केही समयदेखि भक्तपुरको तेर्सेटारमा डेरामा बस्दै आएका थिए। शुक्रबार राति घरायसी विवाद चर्किँदै जाँदा प्रविणले आमामाथि धारिलो हतियार प्रहार गरेको प्रारम्भिक अनुसन्धानबाट खुलेको छ।

घटनामा गम्भीर घाइते भएकी सरिता भण्डारीलाई तत्काल उपचारका लागि भक्तपुर इन्टरनेशनल अस्पताल लगिएको थियो। तर उपचारकै क्रममा उनको मृत्यु भएको जिल्ला प्रहरी परिसर भक्तपुरका प्रहरी नायव उपरीक्षक (डीएसपी) प्रकाश जबेगुले जानकारी दिए।

प्रहरीका अनुसार आक्रमणपछि प्रविण भण्डारीले आफ्नै टाउकोमा पनि धारिलो हतियार प्रहार गरेका थिए। उनी पनि गम्भीर घाइते अवस्थामा फेला परेका थिए र हाल प्रहरीको निगरानीमा उपचार भइरहेको छ। चिकित्सकका अनुसार उनको अवस्था स्थिर बन्दै गएको छ।

घटनाको जानकारी पाएलगत्तै प्रहरी टोली घटनास्थलमा पुगेको थियो। शवलाई पोस्टमार्टमका लागि अस्पतालमै राखिएको छ भने घटनामा प्रयोग भएको धारिलो हतियार प्रहरीले बरामद गरेको जनाएको छ।

प्रहरीले हत्या हुनुको कारण, पारिवारिक अवस्था, मानसिक स्वास्थ्य तथा अन्य पाटोबारे गहिरो अनुसन्धान अघि बढाएको छ। अभियुक्तको स्वास्थ्य अवस्थामा सुधार आएपछि कानुनी प्रक्रिया अघि बढाइने प्रहरीले जनाएको छ।

यस घटनाले भक्तपुर क्षेत्रमा शोक र त्रासको वातावरण सिर्जना गरेको छ। प्रहरीले यस्ता घटनाबाट बच्न पारिवारिक विवाद समाधानका लागि समयमै संवाद र सहयोग आवश्यक रहेको बताएको छ।