सप्तरी, ४ माघ । मधेश प्रदेशका पूर्व मुख्यमन्त्री सतिशकुमार सिंहले प्रतिनिधिसभा निर्वाचनका लागि सप्तरी निर्वाचन क्षेत्र नम्बर २ बाट उम्मेदवारी दिने घोषणा गर्नुभएको छ। उहाँले स्वाभिमान पार्टीको टिकेटबाट प्रतिनिधिसभा सदस्यमा उम्मेदवारी दर्ता गर्ने जानकारी दिनुभयो।
राजनीतिमा लामो समयदेखि सक्रिय रहनुभएका सिंह २०७४ सालको स्थानीय तह निर्वाचनमा तत्कालीन राष्ट्रिय जनता पार्टी (राजपा) बाट तिलाठी कोइलाडी गाउँपालिकाको अध्यक्षमा निर्वाचित हुनुभएको थियो। स्थानीय सरकारको नेतृत्व गर्दै उहाँले विकास, सुशासन र समावेशितामा महत्वपूर्ण पहलहरू गर्नुभएको थियो।
तर, २०७९ सालको स्थानीय तह निर्वाचनमा अध्यक्ष पदमा पुनः उम्मेदवारी दिँदा उहाँ पराजित हुनुभयो। त्यसपछि सिंहले प्रदेशसभा निर्वाचनमा जनमत पार्टीबाट सप्तरी क्षेत्र नम्बर २(क) बाट उम्मेदवारी दिए। यस निर्वाचनमा विजयी भएसँगै उहाँ मधेश प्रदेश सरकारको नेतृत्व गर्दै मुख्यमन्त्रीको जिम्मेवारी सम्हाल्न सफल हुनुभयो।
मुख्यमन्त्रीका रूपमा सिंहले मधेशको समग्र विकास, समावेशिता, सुशासन र नागरिकका अधिकारलाई प्राथमिकतामा राखेर काम गरेको दाबी गर्नुभएको छ। उहाँले प्रदेशमा शिक्षा, स्वास्थ्य, पूर्वाधार र सामाजिक न्यायका क्षेत्रमा विभिन्न पहलहरू अघि बढाएका थिए।
प्रतिनिधिसभा निर्वाचनका लागि उम्मेदवारी घोषणा गर्दै सिंहले सप्तरी र मधेशको विकास, नागरिक हकअधिकार र पहिचानका सवाललाई राष्ट्रिय स्तरमा बलियो रूपमा उठाउने प्रतिबद्धता व्यक्त गर्नुभएको छ। उहाँको उम्मेदवारी घोषणासँगै सप्तरी–२ को राजनीतिक माहोल थप सक्रिय बनेको छ र आगामी निर्वाचनमा प्रतिस्पर्धा तीव्र हुने देखिएको छ।
राजनीतिक विश्लेषकहरूले सिंहको अनुभव र स्थानीय नेतृत्वले उम्मेदवारीमा ठूलो प्रभाव पार्ने अनुमान गरेका छन्। आगामी निर्वाचनमा उहाँको भूमिका मधेश प्रदेशको राजनीतिक परिदृश्यमा महत्वपूर्ण रहनसक्ने बताइएको छ।
प्रकाशित मिति: २०८२ माघ ५, आइतवार १४:१३
