एजेन्सी, वैशाख २३ । तमिलनाडुको राजनीतिक समीकरणमा नयाँ मोड आएको छ। राज्यमा सरकार गठनका लागि कांग्रेस ले अभिनेता–राजनीतिज्ञ विजय नेतृत्वको TVK लाई समर्थन गर्ने निर्णय गरेको छ।
सूत्रहरूका अनुसार कांग्रेसको तमिलनाडु राजनीतिक मामिला समिति (PAC) को आपतकालीन बैठकले सर्वसम्मत रूपमा TVK लाई समर्थन दिने निर्णय गरेको हो। बैठकमा पार्टीका वरिष्ठ नेताहरूले विजयलाई समर्थन गर्दा राज्यमा धर्मनिरपेक्ष सरकार गठन गर्न मद्दत पुग्ने धारणा राखेका थिए।
रिपोर्टअनुसार TVK ले हालै सम्पन्न विधानसभा निर्वाचनमा २३४ सदस्यीय सदनमा १०८ सिट जित्दै ठूलो दल बने पनि बहुमतभन्दा टाढा रहेको छ। सरकार गठनका लागि आवश्यक संख्या पुर्याउन उसलाई अन्य दलहरूको समर्थन आवश्यक थियो।
यसैबीच कांग्रेसले स्पष्ट गरेको छ कि समर्थनको उद्देश्य तमिलनाडुमा धर्मनिरपेक्ष सरकार गठन गर्नु र कुनै पनि हालतमा भारतीय जनता पार्टी (BJP) लाई सत्तामा आउन नदिनु हो।
कांग्रेसका शीर्ष नेताहरूबीच दिल्लीमा भएको उच्चस्तरीय बैठकपछि यो निर्णय सार्वजनिक गरिएको हो। बैठकमा कांग्रेस अध्यक्ष मल्लिकार्जुन खरगे, विपक्षी नेता राहुल गान्धी लगायतका नेताहरू सहभागी थिए।
निर्वाचन परिणामअनुसार DMK ले ५९ सिट, AIADMK ले ४७ सिट, कांग्रेसले ५ सिट, CPI र CPI(M) ले दुई–दुई सिट तथा अन्य साना दलहरूले बाँकी सिट जितेका छन्। BJP ले मात्र एक सिट जितेको छ।
राजनीतिक विश्लेषकहरूका अनुसार कांग्रेसको यो निर्णयले तमिलनाडुको सत्ता समीकरणमा नयाँ गठबन्धनको सम्भावना खोलिदिएको छ, जसले राज्यको आगामी सरकार गठन प्रक्रियालाई निर्णायक रूपमा प्रभावित गर्न सक्छ।
प्रकाशित मिति: २०८३ बैशाख २३, बुधबार ०९:३५
