एजेन्सी, भदौ २८ । पश्चिम एसियामा जारी संघर्षका बीच दक्षिणी इरानको तटीय क्षेत्र होर्मुज नजिकै इरानी व्यावसायिक जहाजमाथि हमला भएको छ। घटनामा एक जनाको मृत्यु भएको छ भने तीन जना घाइते भएका छन्।

इरानी सरकारी सञ्चारमाध्यमका अनुसार फारसको खाडीस्थित रणनीतिक रूपमा महत्वपूर्ण केश्म द्वीप नजिकै आइतबार बिहान उक्त घटना भएको हो। घटनाको पुष्टि केश्म काउन्टीका गभर्नरलाई उद्धृत गर्दै सरकारी सञ्चारमाध्यमले गरेको छ।

हमलामा परी एक जनाको मृत्यु भएको र तीन जना घाइते भएको बताइएको छ। घाइतेहरूको उपचार भइरहेको छ। यद्यपि, उनीहरूको अवस्थाबारे थप विवरण सार्वजनिक गरिएको छैन।

केश्म द्वीप होर्मुज जलडमरूमध्य नजिकै अवस्थित छ। विश्वको महत्वपूर्ण तेल आपूर्ति तथा अन्तर्राष्ट्रिय व्यावसायिक जहाज आवतजावत हुने यस क्षेत्रमा सुरक्षा चुनौतीलाई गम्भीर रूपमा लिइन्छ।

जहाजमाथि भएको हमलाको वास्तविक कारण, प्रयोग गरिएको माध्यम तथा घटनामा संलग्न पक्षबारे हालसम्म विस्तृत आधिकारिक जानकारी सार्वजनिक भएको छैन। घटनाबारे थप विवरणको प्रतीक्षा भइरहेको छ।