काठमाडौं, असोज १६ । राष्ट्रिय स्वतन्त्र पार्टी (रास्वपा)का सांसद रहबर अन्सारीले वीरगञ्जस्थित नेशनल मेडिकल कलेजले चिकित्सा शिक्षाको नाउमा गोरखधन्धा चलाई रहेको आरोप लगाउँदै सरकारको ध्यानाकर्षण गराएका छन्।

शुक्रबार प्रतिनिधिसभाको बैठकमा बोल्दै वीरगञ्ज निवासी अन्सारीले कलेजमा अध्ययनरत पोष्टग्राजुयट (पीजी)का विद्यार्थीहरू विगत १० दिनदेखि आन्दोलनमा रहेको बताए। विद्यार्थीहरूलाई होस्टेल खाली गर्न लगाइएको तथा आन्दोलन गर्न र कलेजको गेटबाट प्रवेश गर्नसमेत रोक लगाइएको उनको दाबी छ।

विद्यार्थीहरूले कलेजमा भइरहेको अनियमितताबारे आवाज उठाएपछि प्रशासनले उनीहरूको आन्दोलन रोक्न खोजेको अन्सारीको आरोप छ।

उनले नेशनल मेडिकल कलेजले करिब २५ जना ‘फेक फ्याकल्टी मेम्बर’ अर्थात् काममा नरहेका प्राध्यापक देखाएर पीजी सिट लिएको दाबी गरे। चिकित्सा शिक्षा आयोगको निरीक्षणका क्रममा कलेज व्यवस्थापनले सुरक्षागार्डलाई समेत बिरामीका रूपमा इमर्जेन्सीमा राखेको आरोप उनले लगाए।

अन्सारीले भने, ‘नक्कली प्रोफेसर र नक्कली बिरामी देखाएर राज्यलाई भ्रममा पार्ने काम भएको छ।’ उनले यस्ता गतिविधिबारे सरकार र सम्बन्धित नियामक निकायले गम्भीरतापूर्वक छानबिन गर्नुपर्ने बताए।

उनले चिकित्सा शिक्षाको क्षेत्रमा यस्ता गतिविधि दोहोरिँदै आएको दाबी गर्दै सम्बन्धित कलेजमाथि कारबाही हुन नसक्नुमा राज्यका विभिन्न निकायमाथि प्रभाव र दबाब रहेको आरोपसमेत लगाए।

अन्सारीले आफ्नो भनाइ कुनै एउटा संस्थालाई लक्षित गरेर नभई चिकित्सा शिक्षामा देखिएको बेथिति अन्त्य गर्नुपर्ने विषय भएको स्पष्ट पारे।

उनका अनुसार कलेजमा देखिएका समस्याबारे आवाज उठाउँदै विद्यार्थीहरू आन्दोलनमा रहे पनि उनीहरूलाई होस्टेल खाली गर्न लगाइएको र कलेज प्रवेशमा रोक लगाइएको छ।

आन्दोलनरत विद्यार्थीमध्ये करिब आधा काठमाडौंमा रहेको जानकारी दिँदै सांसद अन्सारीले विद्यार्थीका माग सम्बोधन गरी समस्या समाधान गर्न सरकारको ध्यानाकर्षण गराए।

अन्सारीले प्रतिनिधिसभामार्फत उठाएका आरोपबारे नेशनल मेडिकल कलेज, चिकित्सा शिक्षा आयोग वा सम्बन्धित अन्य निकायको छुट्टै प्रतिक्रिया भने सार्वजनिक भइसकेको छैन। आरोप पुष्टि वा खण्डनका लागि सम्बन्धित निकायबाट छानबिन तथा आधिकारिक धारणा आवश्यक हुनेछ।