एजेन्सी, साउन २२ । बलूच विद्रोही समूहले पाकिस्तानको सुरक्षाफौजमाथि आक्रमण जारी राखेको छ। पछिल्लो आक्रमणमा एक मेजरसहित तीन जना पाकिस्तानी सैनिकको मृत्यु भएको छ भने तीन अन्य घाइते भएका छन् । बलूच लिबरेशन आर्मीले यस आक्रमणको जिम्मेवारी लिएको छ ।

घटना मंगलवार राति करिब ८ बजे भएको हो । विद्रोहीहरूले एक बुलेटप्रूफ सैन्य गाडीलाई लक्षित गर्दै रिमोट कन्ट्रोल आइईडी विस्फोट गराएका थिए । विस्फोटमा ज्यान गुमाउने सैनिकहरूमा मेजर रिजवान, नायब सूबेदार अमीन र लान्स नायक यूनिस रहेका छन्।

यस हमलामा गम्भीर घाइते भएका तीन सैनिकको अवस्था नाजुक रहेको बताइएको छ। यद्यपि पाकिस्तानी सेनाले यो घटनाबारे हालसम्म कुनै आधिकारिक प्रतिक्रिया दिएको छैन।

बलूच लिबरेशन आर्मीका प्रवक्ता जियंद बलूचले एक वक्तव्य जारी गर्दै यो हमला विशेष खुफिया सूचनाको आधारमा गरिएको बताएका छन्। उनका अनुसार, मेजर रिजवानको काफिलालाई लक्षित गर्दै योजनाबद्ध रूपमा रिमोट कन्ट्रोल आइईडी प्रयोग गरिएको थियो।

बलूचिस्तान क्षेत्रमा पछिल्ला महिनाहरूमा पाकिस्तानी सुरक्षाफौजमाथि आक्रमण बढेका छन्। द बलूचिस्तान पोस्टका अनुसार, जुलाई महिनाको मध्यदेखि अहिलेसम्म मात्र चारजना मेजर स्तरका सैन्य अधिकारीहरू विभिन्न आक्रमणमा मारिएका छन्।

विश्लेषकहरूको भनाइमा, यो तथ्यले बलूच विद्रोही समूहको सञ्चालनात्मक र खुफिया क्षमतामा वृद्धि भएको देखाउँछ। उनीहरूको उद्देश्य पाकिस्तान सेनामाथि मनोवैज्ञानिक दबाब सिर्जना गर्नु हो।

बलूच विद्रोही समूहहरूले विगत केही दशकदेखि स्वतन्त्रता र स्वशासनको माग गर्दै पाकिस्तानी राज्यसंरचनामाथि संघर्ष गरिरहेका छन्। अहिलेका हमलाहरूले संघर्षलाई अझ गहिरो बनाउँदै लगेका छन्।

आक्रमण यति गम्भीर हुँदासमेत पाकिस्तानी सेनाले कुनै सार्वजनिक बयान दिएको छैन। यसले देशभित्र राजनीतिक र सुरक्षात्मक अस्थिरता झन् बढ्ने आशंका गरिएको छ।