कपिलवस्तु , चैत १८। कपिलवस्तुको शुद्धोधन गाउँपालिका ३ ठुलो सिसहानियामा आगलागीबाट ७ बिघाको गहुँबाली जलेर नष्ट भएको छ । कम्बाइनले एक्कासी खेतमा आगलागी हुँदा १५ जना किसानको ७ बिघामा लगाइएको गहुँबाली जलेर नष्ट भएको प्रहरीले जनाएको छ ।
करिब २०० क्विन्टल बराबरको गहुँ बाली नष्ट भएको प्रहरीले जनाएको छ । प्रहरीले दिएको जानकारी अनुसार ठूलो सिसहानिया गाउँको खेतमा गहुँ काट्ने क्रममा आगो लागेपछि सोही आगो १५ जना किसानको गहुँबालीमा सल्किएको थियो ।
आगलागी भएको सूचना पाए लगत्तै प्रहरी चौकी लबनीको टोली आगलागी स्थलमा खटिएको छ । प्रहरी, दमकल र स्थानीयको सहयोगमा आगो पूर्णरुपमा नियन्त्रणमा आएको स्थानीयले जनाएका छन् ।
आगलागीबाट कुनै मानवीय क्षति नभएको प्रहरीले जनाएको छ । स्थानीय महिबुदिन मुसलमान , नैतुल्ला मुसलमान ,हकिकुल्ला मुसल्लमान लगायतको खेतमा आगो लागेको हो ।
प्रकाशित मिति: २०८१ चैत्र १८, सोमबार २०:००
