काठमाडौं, भदौ २ । नेकपा एमालेले बागमती प्रदेशको मुख्यमन्त्रीमा प्रदेश सभा सदस्य किरण थापालाई अघि सार्ने निर्णय गरेको छ। मंगलबार केहीबेरअघि बसेको एमाले संसदीय दलको बैठकले थापालाई मुख्यमन्त्री बनाउने निर्णय गरेको हो।
बैठकले संसदीय दलका नेतामा भने जगन्नाथ थपलियालाई नै निरन्तरता दिने निर्णय गरेको छ।
बागमती प्रदेशको मुख्यमन्त्रीका लागि एमालेभित्रै नेताहरूबीच तीव्र प्रतिस्पर्धा र विवाद भइरहेका बेला संसदीय दलको बैठकले थापाको नाममा सहमति जुटाएको हो।
एमाले र नेपाली कम्युनिष्ट पार्टी (नेकपा)बीच नयाँ सत्ता समीकरण बनेपछि प्रदेश सरकारहरूको नेतृत्वसमेत भागबण्डा गरिएको थियो। उक्त सहमतिअनुसार बागमती प्रदेश सरकारको नेतृत्व एमालेको भागमा परेको हो।
मुख्यमन्त्री एमालेको भागमा परेसँगै पार्टीभित्र आकांक्षी नेताहरूबीच नेतृत्वका लागि लामो समयदेखि रस्साकस्सी चल्दै आएको थियो। अन्ततः संसदीय दलको बैठकले किरण थापालाई मुख्यमन्त्री बनाउने निर्णय गरेको हो।
अब थापाले प्रदेश सरकार गठनका लागि आवश्यक प्रक्रिया अघि बढाउनेछन्।
प्रकाशित मिति: २०८३ भाद्र २, मंगलवार १६:०३
