जनकपुरधाम, कात्तिक १। ऐतिहासिक तथा धार्मिक नगरी जनकपुरधामलाई स्वच्छ, सुन्दर र स्वस्थ बनाउने उद्देश्यले ‘सफा गरौँ’ अभियानको औपचारिक शुभारम्भ गरिएको छ। जनआस्थाको प्रमुख केन्द्र जानकी मन्दिर परिसरबाट सुरु गरिएको उक्त अभियानले सहरको सरसफाइ व्यवस्थामा सुधार ल्याउनुका साथै नागरिकमा स्वच्छतासम्बन्धी चेतना अभिवृद्धि गर्ने लक्ष्य लिएको छ। द कोका-कोला फाउन्डेसनको आर्थिक सहयोग, क्रिएसनको नेतृत्वदायी साझेदारी तथा कार्ड नेपाल (CARD Nepal) को समन्वय र कार्यान्वयनमा सञ्चालन भइरहेको अभियानको पहिलो दिन ३० जनाभन्दा बढी युवा स्वयंसेवक सरसफाइ कार्यमा सहभागी भएका थिए।

हातमा झाडु, पञ्जा र फोहोर सङ्कलन गर्ने बोरा लिएर अभियानमा जुटेका युवाहरूले जानकी मन्दिर परिसर तथा आसपासका क्षेत्रमा छरिएका फोहोर सङ्कलन गरेका थिए। मास्क लगाएर सरसफाइमा सक्रिय युवाहरूले धार्मिक तथा पर्यटकीय स्थललाई स्वच्छ राख्न नागरिक स्वयंको भूमिका महत्वपूर्ण हुने सन्देश दिएका छन्। जनकपुरधाम धार्मिक, सांस्कृतिक तथा ऐतिहासिक दृष्टिले महत्वपूर्ण सहर हो। यहाँस्थित जानकी मन्दिरमा दैनिक रूपमा ठूलो सङ्ख्यामा श्रद्धालु तथा पर्यटक आउने गर्छन्। यस्तो महत्वपूर्ण धार्मिक स्थल र आसपासका सार्वजनिक क्षेत्र सफा राख्नु स्थानीय सरकार, व्यवसायी, नागरिक समाज तथा सर्वसाधारण सबैको साझा जिम्मेवारी रहेको अभियानसँग सम्बन्धित पक्षको धारणा छ।

‘सहर सफा गर्ने जिम्मेवारी कसैको एक्लो होइन, हामी सबैको साझा दायित्व हो’ भन्ने मूल सन्देशसहित सुरु गरिएको अभियानले फोहोर व्यवस्थापनमा नागरिकको सक्रिय सहभागिता बढाउने अपेक्षा गरिएको छ। सरसफाइलाई एक दिनको औपचारिक कार्यक्रमका रूपमा मात्र सीमित नराखी दैनिक जीवनको व्यवहार बनाउनुपर्ने आवश्यकतासमेत यस अभियानले उजागर गरेको छ। अभियानमा सहभागी युवाहरूले सरसफाइका लागि अरूको पहल पर्खिनुभन्दा आफैँ अग्रसर हुनुपर्ने सन्देश दिएका छन्। उनीहरूको सक्रियताले जनकपुरधामलाई स्वच्छ, व्यवस्थित र आकर्षक धार्मिक तथा पर्यटकीय गन्तव्यका रूपमा विकास गर्न युवाहरूले सकारात्मक भूमिका खेल्न सक्ने देखाएको छ।

आयोजकका अनुसार आगामी दिनमा पनि अभियानलाई निरन्तरता दिँदै थप युवा, स्थानीयवासी तथा सरोकारवालालाई सहभागी गराउने योजना रहेको छ। अभियानलाई विस्तार गर्दै जनकपुरधामका विभिन्न सार्वजनिक स्थल तथा अन्य क्षेत्रमा समेत सरसफाइसम्बन्धी गतिविधि सञ्चालन गर्ने लक्ष्य राखिएको छ। जनकपुरधामलाई सफा र सुन्दर बनाउने अभियान सफल बनाउन स्थानीयवासीको निरन्तर सहयोग आवश्यक रहेको आयोजकहरूले बताएका छन्। उनीहरूले फोहोर जथाभावी नफाल्न, सार्वजनिक स्थानको सरसफाइमा ध्यान दिन तथा सरसफाइ अभियानमा सक्रिय रूपमा सहभागी हुन सबै नगरवासीलाई आग्रह गरेका छन्।

धार्मिक तथा सांस्कृतिक पहिचानका लागि परिचित जनकपुरधामको सौन्दर्य र गरिमा कायम राख्न यस्ता अभियानले सकारात्मक योगदान पुर्‍याउने विश्वास गरिएको छ। ‘आउनुहोस्, हातेमालो गरौँ, आफ्नो सहर आफैँ सफा राखौँ’ भन्ने आह्वानसहित सुरु भएको ‘सफा गरौँ’ अभियानले जनकपुरधाममा स्वच्छता र सामूहिक जिम्मेवारीको संस्कार विकास गर्न सहयोग पुर्‍याउने अपेक्षा गरिएको छ।