काठमाडौं, भदौ १५ । एसीसी पुरुष प्रिमियर कप २०२६ मा नेपालले शानदार विजयी सुरुवात गरेको छ। समूह ‘ए’ अन्तर्गत आफ्नो पहिलो खेलमा नेपालले बहराइनलाई ७ विकेटले पराजित गरेको हो।
मलेसियाको बाङ्गीस्थित वाईएसडी–यूकेएम क्रिकेट मैदानमा बहराइनले दिएको ८८ रनको सामान्य लक्ष्य नेपालले २१ ओभरमै ३ विकेट गुमाएर पूरा गर्यो।
नेपालको जितमा ओपनर अर्जुन कुमालले महत्वपूर्ण योगदान दिए। उनले ३६ रन बनाएर अविजित रहे। कप्तान रोहित पौडेलले १४ बलमा १९ रन जोड्दा आसिफ शेखले पनि १९ रन बनाए।
यसअघि टस जितेर ब्याटिङ गरेको बहराइन नेपाली बलरको उत्कृष्ट प्रदर्शनसामु टिक्न सकेन। बहराइनको टोली ३६।२ ओभरमा ८७ रनमै अलआउट भएको थियो।
बहराइनका लागि फियाज अहमदले सर्वाधिक १५ रन बनाए। मुहम्मद वासिमले १३ तथा अली दाउदले १० रन जोडे। अन्य कुनै पनि ब्याटरले दोहोरो अंकमा रन बनाउन सकेनन्।
नेपालका लागि कप्तान सन्दीप लामिछानेले घातक बलिङ गर्दै १० ओभरमा ४ मेडनसहित १४ रन खर्चिएर ५ विकेट लिए। ललित राजवंशीले ३ तथा करण केसीले २ विकेट लिए।
बहराइनलाई सस्तैमा समेटेपछि नेपालले सहज रूपमा लक्ष्य पछ्याउँदै प्रतियोगितामा पहिलो जित हात पारेको हो।
यस जितसँगै नेपालले समूह ‘ए’ मा महत्वपूर्ण दुई अंक जोडेको छ। प्रतियोगिताको समूह चरणमा उत्कृष्ट प्रदर्शन गर्दै सेमिफाइनलमा स्थान बनाउने लक्ष्य नेपालले राखेको छ।
प्रकाशित मिति: २०८३ भाद्र १५, सोमबार १४:५४
