एजेन्सी, साउन ६ । बिहारका पूर्वमन्त्री तेज प्रताप यादवको नयाँ डिजिटल कदमले बिहारको राजनीतिक वृत्तमा पुनः एकपटक हलचल मचाएको छ । राष्ट्रिय जनता दल (आरजेडी) बाट निष्कासनपछि चर्चामा रहेका तेज प्रतापले हालै नयाँ सामाजिक सञ्जाल पेज सार्वजनिक गरेका छन्, जसले पुनः उनी राजनीतिमा सक्रिय रूपमा फर्किन सक्ने संकेत दिएको छ ।

राजनीतिक विश्लेषकहरूका अनुसार तेज प्रताप अब आफ्नै राजनीतिक छाया निर्माण गर्ने दिशामा अघि बढिरहेका छन्। नयाँ पेजमा उनी लगातार सक्रिय देखिएका छन् र उनी आगामी बिहार विधानसभा चुनावलाई ध्यानमा राख्दै नयाँ भूमिका परिभाषित गर्ने तयारीमा देखिन्छन् ।
तेज प्रतापले आफ्नो नयाँ पेजमा लेखेका छन् – “जिसका कायम है प्रताप, वह है आपका अपना तेजप्रताप।“ यो पंक्तिले राजनीतिक वृत्तमा नयाँ चर्चाको शृंखला सुरु गराएको छ। विश्लेषकहरूको अनुमान छ कि यो उनी कुनै नयाँ राजनीतिक दल वा प्लेटफर्मको तयारी गरिरहेका छन् भन्ने सङ्केत हुन सक्छ । यद्यपि, तेज प्रतापले कुनै नयाँ पार्टी घोषणा अहिलेसम्म गरेका छैनन ्।

नयाँ पेजमा उनका आमाबुबा लालू प्रसाद यादव र राबड़ी देवीका तस्वीरहरू पनि राखिएका छन्। यसले पारिवारिक सम्बन्ध अझै पनि कायम रहेको देखाउँछ । आरजेडीबाट निष्कासित भए पनि उनले परिवारसँग दूरी बनाएका छैनन् भन्ने बुझिन्छ।

लालू यादवले उनलाई ६ वर्षका लागि पार्टीबाट निष्कासित गरेको चर्चा भए पनि यसको औपचारिक जानकारी बिहार विधानसभा सचिवालयलाई दिइएको छैन। यसकारण, तेज प्रताप अझै पनि पुरानै हैसियतमा विधानसभा सदस्यको रूपमा उपस्थित भइरहेका छन्।

तेज प्रताप यादवको नयाँ डिजिटल सक्रियता, सशक्त नारा, पारिवारिक समर्थन र राजनीतिक व्यस्तता हेर्दा, यो उनी नयाँ राजनीतिक पारी सुरु गर्ने तयारीमा रहेको संकेत हुन सक्छ । अब हेर्न बाँकी छ – के उनी नयाँ पार्टीको घोषणा गर्छन् वा कुनै वैकल्पिक मोर्चाबाट चुनावी मैदानमा उत्रिन्छन् ।