जनकपुरधाम, असोज १० । आज भाद्र पूर्णिमाका दिन सोह्र श्राद्धअन्तर्गत पितृ तर्पण गर्ने क्रम आजदेखि सुरु भएको छ । हिन्दू धर्मावलम्बीहरूले दिवंगत पितृको सम्झनामा तर्पण, पिण्डदान तथा श्राद्ध गर्दै पितृप्रति श्रद्धा व्यक्त गर्ने परम्पराअनुसार आजदेखि तर्पण सुरु गरेका हुन् ।

पूर्णिमाका दिन नजिकको जलाशयमा पुगी अगस्तय ॠषिको नाममा तर्पण गर्ने परम्परा रहेको छ । भाद्र पूर्णिमाको अवसरमा आज जनकपुरधाम स्थित गंगा सागरमा तर्पण शुरु गर्नेहरुको घुइचो लागेको थियो । जनकपुरधामको गंगासागर सहित मिथिलाञ्चलका अधिकांश धार्मिक महत्वका जलाशयहरुमा पुगेर श्रद्धालुहरु तर्पण कार्य शुरु गरेका छन ।

पितृ तर्पण एवं सोह्र श्राद्ध भने भोली असोज कृष्ण प्रतिपदा देखी शुरु हुने परम्परा रहेको छ । आश्विन कृष्ण प्रतिपदादेखि सुरु हुने सोह्र श्राद्ध औँसीसम्म चल्ने गर्दछ । यस अवधिमा आफ्ना दिवंगत पितृको तिथिअनुसार श्राद्ध गर्ने परम्परा रहेको छ ।

सोह्र श्राद्धका क्रममा परिवारजनले पितृको तिथिअनुसार श्राद्ध, तर्पण र पिण्डदान गर्ने गर्छन् । विशेषगरी गंगासागर, धनुषसागरलगायतका धार्मिक तथा पवित्र जलाशयमा तर्पण र पिण्डदान गर्ने भक्तजनको चहलपहल बढ्ने गरेको छ ।

जनकपुरधामसहित मधेस प्रदेशका विभिन्न धार्मिक स्थलमा पितृपक्ष सुरु भएसँगै श्रद्धालुको आवागमन बढ्ने अपेक्षा गरिएको छ । पितृपक्षमा पितृको स्मरण तथा पूजा–आराधना गरेमा दिवंगत आत्माले शान्ति प्राप्त गर्ने धार्मिक विश्वास रहिआएको छ ।

सोह्र श्राद्धको अवधिमा विभिन्न तिथिमा श्राद्ध गर्ने गरिए पनि कुनै कारणले आफ्ना पितृको तिथि थाहा नभए वा तिथिमा श्राद्ध गर्न नसकिए सर्वपितृ औँसीका दिन श्राद्ध गर्ने चलन रहेको छ ।

पितृपक्षमा श्रद्धालुले सात्त्विक भोजन गर्ने, दान–पुण्य गर्ने तथा पितृको स्मरणमा धार्मिक कार्य गर्ने परम्परा पनि छ । यस अवधिमा जनकपुरधामका विभिन्न घाट तथा धार्मिक स्थलमा विशेष चहलपहल हुने गर्दछ ।