काठमाडौँ, असार १० । मलेसियामा जारी एसीसी पुरुष यु–१६ इस्ट जोन क्रिकेट प्रतियोगिताको दोस्रो खेलमा नेपालले जापानलाई मात्र ८० रनमै समेट्न सफल भएको छ। कोजल टुन्कु जाफर ओभलमा आज भएको खेलमा नेपालका बाँयाहाते स्पिनर शुभम खनालले पाँच विकेट लिँदै उत्कृष्ट प्रदर्शन गरे पछि जापान ८० रनमा अलआउट भएको छ ।
टस जितेर पहिले ब्याटिङ गर्ने निर्णय लिएको जापानले सुरुवातदेखि नै नेपाली बलरहरूको कसी भएको बलिङको सामना गर्न सकेन । ३४.३ ओभरमा पूरै टिम अलआउट हुँदै ८० रनमा समेटियो। कप्तान चार्ली हाराहिन्जले सर्वाधिक ३६ रन बनाए भने गबी हाराहिन्जले १३ रन जोड्न सफल भए। तर अन्य ब्याटर भने नेपाली बलिङको सामु निरिह देखिए, र दोहोरो अङ्कमा पुग्न पनि सकेनन्।
जापान ८० रनमा अलआउट गर्न नेपालका लागि बलिङमा शुभम खनाल चम्किए। उनले ५ विकेट लिएर जापानको ब्याटिङ लाइनअपलाई ध्वस्त बनाए। अभय यादवले २ विकेट लिए भने सुशील रावल र विपिनप्रसाद शर्माले समान १–१ विकेट लिँदै राम्रो साथ दिएका थिए।
नेपालले यसअघि प्रतियोगिताको पहिलो खेलमा सिङ्गापुरलाई ६ विकेटले पराजित गरेको थियो। आजको खेलमा पनि नेपाल बलिङतर्फ पूर्ण नियन्त्रणमा देखिएको छ।
अब नेपालले ८१ रनको विजयी लक्ष्य पछ्याउँदै जवाफी ब्याटिङ गरिरहेको छ। यस खेलमा पनि नेपाल विजयी हुने प्रबल सम्भावना रहेको छ, जसले प्रतियोगितामा नेपाललाई शीर्ष स्थानमा उकास्न सहयोग पुर्याउनेछ।
नेपाल यु–१६ टिमको लगातार प्रदर्शनले युवा क्रिकेट विकासतर्फको लगानीको सकारात्मक प्रभाव देखिएको छ। प्रशिक्षक मण्डल र क्रिकेट समर्थकहरू शुभम खनालको प्रदर्शनबाट विशेष उत्साहित देखिएका छन्।
खेलको अन्तिम परिणामका लागि अहिले नेपालको जवाफी इनिङ्सप्रति ध्यान केन्द्रित गरिएको छ। यदि नेपालले यो लक्ष्य सहजै पछ्यायो भने, समूह चरणमा आफ्नो पकड बलियो बनाउनेछ।
प्रकाशित मिति: २०८२ असार १०, मंगलवार ११:०३
