जनकपुरधाम, फागुन २७ । मधेश प्रदेशले प्रधानमन्त्री कप राष्ट्रिय पुरुष एकदिवसीय क्रिकेट प्रतियोगितामा विजयी सुरुआत गरेको छ ।
जितसँगै मधेशले दुई अंक जोडेको छ । दुवै खेलमा पराजित कोशी अंकविहिन छ । पहिलो खेलमा कोशी लुम्बिनीसँग २६ रनले पराजित भएको छ ।
मंगलबार सिद्धार्थनगर रंगशालामा मधेशले कोशी प्रदेशविरुद्ध १६५ रनको फराकिलो जित जित निकाल्यो ।
मधेशले प्रस्तुत गरेको २८५ रनको लक्ष्य पछ्याएको कोशी ३३ ओभरमा ११९ रनमै समेटियो । कोशीका लागि शकिब हकले २५, सुजन थपलियाले २४, फिरदोर अन्सारीले २१ र दिपेश कँडेलले २० रन बनाए ।
मधेशका लागि रुपेश सिंहले ९ ओभरमा २९ रन खर्चिदै पाँच विकेट लिए । यसैगरी राजेश यादवले तीन, हरिशंकर शाह र प्रदीप पास्वानले समान एक विकेट लिए ।
त्यसअघि टस जितेर ब्याटिङ रोजेको मधेशले निर्धारित ५० ओभरमा ६ विकेट गुमाउँदै २८४ रनको योगफल तयार पारेको थियो ।
मधेशका लागि पवर सराफले ८५ बलमा ११ चौका र दुई छक्काको मद्दतले सर्वाधिक ९२ रनको योगदान गरे ।
यसैगरी कप्तान अनिलकुमार साहले ७५ बलमा १० चौकाको मद्दतले ७५, दिपेश दासले ६० बलमा सात चौका र एक छक्काको मद्दतले अविजित ५०, हरिशंकर शाहले २९ र रुपेश सिंह र मानय यादवले समान १० रन बनाए ।
छैटौं विकेटका लागि पवन र दिपेशले १२३ तथा दोस्रो विकेटका लागि अनिल र हरिशंकले ८७ रनको साझेदारी गरे ।
कोशीका लागि विपिन महतो र प्रकाश कार्कीले समान दुई तथा फिरदोस अन्सारी र दिपेश कँडेलले समान एक विकेट लिए ।
प्रकाशित मिति: २०८१ फाल्गुन २७, मंगलवार १६:१६
